ЗАВЕЩАНИЕ ЛАЗАРЯ МУРОМСКОГО

Житие преподобного Лазаря

ЗАВЕЩАНИЕ ЛАЗАРЯ МУРОМСКОГО

(Амвросий. История Российской иерархии. Т. 5, стр. 114 —119. — СПБ, 1813) Аз, многогрешный инок, Лазарь Римский обители Высокогорския, постриженик, отца нашего игумена Афанасия Дискота. Той Афанасий многи обители огради и братию упас в добре наказании. Аз же грешный послан епископом Царя града Василием повесть сказати епископу Василию, иже Великого Нова Града кормило правящу, о белом клобуке, како ему явился ангел господень, и о мне, грешном, повесть духовно и явленно да скажется, Василием епископом Новгородским.

Аз, многогрешный инок Лазарь в Василиеве Киновии препроводи с ним 9 лет. Известно уверихся писаниеми господин мой кесария Великий духовный настоятель и учитель моему спасению Василий епископ отиде ко господу, в вечные селения. И по мале времени Великого Ново града пастырь и учитель, добропения цевница, небесного царя Василий епископ и Великого Нова града возлетает в вечные обители. Прими на себе самого небесного царя схимну и той отиде ко господу ему же добре послужи.

Аз, многогрешный Лазарь своими руками спустив святое тело Великого святителя Василия епископа Великого Нова града и многи слезы над ним ко господу пролиям. И найде на мя печаль велия: обое Василия лишихся и много молих господа бога и Пречистую Богородицу и великого во пропроцех предтечу господня Иоанна. Пребывающую ми в келий господина моего Василия епископа Великого Нова града и по мале времени по отшествии своем ко господу явися мне в нощи Василий епископ Великого Нова града и повеле ми итить на Северную страну близ Океана моря: тамо бо есть великое озеро, Онего именуемое, и остров именова мне.

Аз же, грешный, не внях о том явлении. И по мале времени явися мне господин мой великия Кесарии Василий епископ и глагола мне: помни, Лазаре, что ты глагола епископ Василий Великого Нова града, восстани и иди на показанное ти место нами. Будет твоя обитель велия и братия собереши множество. И аз, многогрешный инок Лазарь, внях сказаемое о святом месте сем обема епископами. А тогда что любе в Великом Нова граде колено Захарьевича Ивана. К сему же аз приидох и молихся ему, что бо ми на сожительство дал остров сей именуемый Муромский, воздвигнути церковь и монастырь оградити. Он же первое возмолихся и сказа ми о острове.

Аз же многожды молих его, також сказа мне. И по мале времени моления моего явися ему страшный образом господин мой, Василий епископ Великого Нова града и глагола ему: да будет сии остров именуемый Муромский на поставлении обители и на сожительство сподругу нашему иноку Лазарю, с твоей области жребия часть: в нем бо хощет прославитися имя Пречистыя Богоматери. По явлении святителя Василия, властелин Великого Нова града Иван Захарович призвав мя и глагола мне на едине: поди отче по твоему прощению Богом на показанное тебе место и мою отчизну на Онего озеро на Муромский остров. И потом поведа мне, како явися ему страшным образом святитель Василий епископ Великого Нова града и с прещением глагола о тебе, и повеле ми дати тебе, иноче, на сожительство прадеда наших отчизну на Онего озеро остров именуемый Муромский; и глагола ми епископ Василий: на нем же острове тобою хощет быти обитель велия, и собереши иноке множество, о тебе бо хощет прославитися имя Пречистыя Богоматери.

Аз же слышал от уст его таковыя, возрадовахся радостию великою и пад поклонихся ему и отьидох с миром, и хвалих Бога моего от всеге сердца, и от угодника его святителя Василия. И по мале времени начах касатися пути шестования и отшествия пути плавания по озеру Онегу. Бысть мне по Давиду, на воде пререкания, подъях велия и скорби, с нуждою едва достигах сей Муромский остров. Поведаю вам, братие, первое един аз приидох на место сие святое, живущего никого же не имах. На сем острове поставих крест и малу хижу, какая ради телесного, тоже молитвенный храм, сиречь часовню. А живущие тогда именовались около озера Онего лопяне и чудь, страшивыя сыроядцы, близ места сего живяху. Поведаю вам, братие, о таковых неблагодарных иноязычницах по апостолу рекшу: братия! многими скорбми подобает нам выйти в царство небесное. Много скорби и биения и раны претерпех от сих зверообразных мужей. Многажды бывши низгнаша мя от острова сего и хижу мою огню предаша. А сами окаянные по наущению бесовскому подлежаху и мечты многи деяху. И сотвориша селитву близ мене с женами и детьми, и пакости многи твориху и глаголаху: Калугаре! останися места сего, и хотяху мя сыроядцы убити и тело мое в яд себе сотворити.

Увы, мне грешному! Многажды оставлях место сие святое. Но Бог Спаситель мой не остави меня, и не напусти таковых окаянных каковая злая начинания сотворити, и укрепи мя, и обратиши на путь спасения; тыи окаянные сыроядцы многи ослепота. Се братия, чудно и ужасны исполнено видение поведаю вам: крыющемуся блигз озера Мурома и сидящему ми в куште и ожидаюшу конца смерти от злых человек; они же искаху убити мя.

Аз же страдальческим венцом увязахся и воспомянух писание: многим бо волнам к камени приражающимся, и пены творяща, и зла ничтоже успети могуща, и седящу ми в куште, и в нощи молящемуся Господу Богу и Пречистые Богоматери и великому предтечи господню Иоанну и святителю Николе и Василию епископу Велика Нова града, поющу псалтирь и каноны, издалеча воззрех Богом на показанное место, идеже первое приидох по глаголу Господню: видех на сем острове свет велий сияющ и по нему хождаху мужии благообразные, согласующиеся друг с другом. Посреди же острова сего видев жену светолепну златом сияющу. Мужии же они святые окружающи место сей, прихождаху молящееся ей, идеже ныне церковь стоит во имя Успения Пречистой Богородицы, на нем же месте видех жену светолепну.

Аз же от видения того радости исполнихся и со слезами пад пред образом владыки Христа Бога и Пречистые Богоматере, и на дользе плачущу и молящуся, и начах пети утреню, тоже утру свистающу воспех псалом, блажени непорочни в путь, и приидох на место сие и поставих образ у древа и помолихсия, отидох и глаголах в себе: се покой, зде вселюся во веки, и поставих крест и хижу малу, ископах себе пещеру вне монастыря. По мале же времени прииде же ко мне муж лоплянин старейший, нося на руку отроча слепа от рождения и глагола мне: да сотвериши его здорова и мы итидем от острова сего, идеже повелевают нам отроцы твои.

Аз же о словеси сем удивихся и моление сотворих о нем Господу Богу и Пречистой его Богоматери, и взем отроча и молитвою иерейскою освятых его и окропих святою водою, и приложих ко владычню образу: оной же прозре. Муж же той отиде с радостию.

Аз же о таковом чудеси прославнх Бога. По мале времени той же муже прииде ко мне, и приносе ми нечто от имения своего и от братен. Аз же едину кожицу еленю и мало нечто от братен взях, и молебная соверших о нем ко Господу. Муж же преждереченный сей кланяйся глагола ми: с тобой суть живущи отроци на месте сеч жен и детей наших зело биют на месте сем жезлием и отсылают от места сего. И о том поведа ми, како они слышат звон от места сего.

Аз же отпустих его с миром, и о весх благодарих Бога. И по мале времени Божьим промыслом лопяне и самоядь отидоша от места сего к ‘пределы Океана моря. Преждереченный же муж той жительство имея на Рондо озеро и последи бысть мних и сынове его крестишася. И начата людие от дальних стран приходити и сожительствовав со мною и онии постригахуся; и поставиша церковь древяну воскресение друга Божия Лазаря. А тогда бысть Великого Нова града епископ Моисей и приидох аз к нему и благословение взем от него.

Святитель же вопросих мя всю поряду. Он же почудися и похвали место сие. И дал мне антиминс и священные сосуды, и милостию доволню и поучих мя како чин церковный и монастырская предании хранити и даде мне подписанные своея казны и благослови. Аз же вопросих о властелине Великого Нова града Иване — он же глагола мне: отиде ко Господу. И приидох к сынове его Федору, он же приял мя с любовью и глагола ми: отец мой отиде ко Господу и повеле ми отдати тебе сто гривен, яже прежде взял у тебя по Муромском острове. Аз же оскорбихся о том, уже хощет от мене взяти остров сей. Он же видев мя прискорбна и глагола мне: есть, господин, писание отца моего тебе о острове, на нем же ты живеши. И по мале времени к нему же аз приидох. Он же по поведению отца своего отдает ми 300 гривен, и инна многа от своих имений на строение обители и писание рукою отца своего дает ми на хартии написано сице: «Во имя Отца и Сына и Святого Духа дал посадник в лето 6690 Словенского конца Иван Фомин сын, Пречистой Богородицы, да священнику Лазарю, и сеюю чернцем, часть свою земли и воды по своей души и по своих родителех, на Онеге озере остров Мучь со всею земли, и озеро Муромское, и около озера речки и островки и в сих воды, и ловища и перевесища, что владел и потому обову в островах и в Мандере сенные покосы и полешие земли и воды. Владети землею и водой пречистой всем, чернцем во веки, а детям моим не вступатце. А волостянам силы не делать, земли и воды не отнимать. А владети землей и водой по духовной и по купной грамоте деда моего во веки. А купная грамота чернцем водерен. А кто наступит и грамоту нашу порушит и он Богу и Пречистой суд отдасть в оном веце. У сей духовной на утверждение приложил Иван Фомин образ Пречистой Богородице с превечным младенцем свинцовой, да воображение животворящего креста на другой стороне». Также приидох к святому гробу святителя Василия епископа Великого Нова града и приложихся к святому гробу его. И приидох ко епископу Моисею града тому приять благословление от него и просити отпустата. Он же благослови мя и отпусти в путь с миром.

Аз же начах касатися пути. По мале времени достигах святого места сего. Братие же радостно с любовью сретоша. Также певша молебная и разидошася.

Аз же наипаче пещися о месте сем начах, а освятих церковь Воскресения друга Божия Лазаря. И потом поставил келии мнихом на прибежище и оградих место сие. Тоже придоша ко мне иноцы из Киева старец Иона, да старец Ефросин и сожительствоваху со мной. И поставиша церковь прекрасну, во имя Успения Пречистая Богородицы Печерская. Аз же о том вельми возрадовахся и упования положих на Бога и на Пречистую Богородицу. Также число людей ученик стада Христова умножишися, времени же не малу минувшу, прииде к нама старец Феодосии святыя горы вельми добродетельно житие имея к Богу и вериги тяжки на теле своем нося. И постави трапезу Иоанна своим именем. И прославися слава о месте сем свя: том, и начата приходити от дальних стран постригахуся во иноческий чин и сожительствоваху с нами. А прежде звася место сие Мучь остров. Феодосии же инок премудр бе книжной мудрости, именову монастырь Успение Богородицы Муромской. Аз же грешный инок Лазарь состарехся и янися ми сподружник мой великий господин Василий епископ Великого Нова града и поведа ми конец жития моего. И о видении сем благодарих Бога и епископа Василия. По мале же времени призвах братию и глаголах им: братие моя! Уже бо сами видите, конец жития моего приспе явися ми кончина моя. Изберите себе из братии вожда и учителя богоизбранному своему стаду. Они де вси единодушно со слезами вопияши глаголаху. не остави нас отче сиры. Постави, господне, нами своея руки пастыря вожда и учителя богоизбранному своему стаду.

Аз же благослових Феодосия святые горы пастырем и учителем. По моему преставлению быти ему над всею братией старейшиной и учителем.

ПРИПИСКА К «ЗАВЕЩАНИЮ» ДРУГИХ:

«И глагола нама: уже братия сия обители не будет над нами начальства имети, не от приходящих братии «прочих киновии».

Святый Авва, инок Лазарь причастився святых тайн Тела и Крови Христовой Бога нашего, и последние целование дав братии, и благослових их, и святый руце свои воздав на небо и предаст душу господу. Братия видевши преставление отца своего, скутавша святое тело честно со псалмопением и погребоша его за алтарем воскресения друга божия Лазаря, идеже первое преподобный крест постави.

ПРИПИСКА К «ЗАВЕЩАНИЮ» ПРЕЕМНИКА ЛАЗАРЯ:

«Аз же грешный священноинок Феодосий святые горы слышах таковые повествование о святом месте сем от господина моего старца Лазаря от его уст, о послании из Рима Василия епископа Цареграда и како ему явися ангел господен и повеле идти на место сие искупленные, места и о терпении на месте сем от сыроядцев, писанию предах.

Представися Авва Лазарь в лето 6609 месяца марта в 8 день. А всех лет живота его (105). По иноке Лазаря панихида пета и литургия отправлят марта 24 числа.